ತುರಿಕೆ -ಕಾರಣ ಮತ್ತು ಪರಿಹಾರ

ಸಾಮಾನ್ಯವಾಗಿ ರೋಗಿಗಳು ವೈದ್ಯರ ಬಳಿ ಹೋಗುವುದು ಏನಾದರೂ ತೊಂದರೆಯಾದಾಗ. ಸಾಮಾನ್ಯವಾಗಿ ದೈಹಿಕ ಕಾಯಿಲೆಗಳು ಅಥವಾ ಸಮಸ್ಯೆಗಳಲ್ಲಿ ಮುಖ್ಯವಾದ ತೊಂದರೆಯೆಂದರೆ ನೋವು.ಈ ನೋವಿನ ಪರಿಹಾರಕ್ಕಾಗಿಯೇ ರೋಗಗಳು ವೈದ್ಯರ ಬಳಿಗೆ ಹೋಗುತ್ತಾರೆ.ಹಾಗೆಯೇ ಚರ್ಮದ ವಿಷಯಕ್ಕೆ ಬಂದರೆ, ಚರ್ಮರೋಗಗಳು ಮತ್ತು ಸಮಸ್ಯೆಗಳಲ್ಲಿ ಮುಖ್ಯವಾದ ತೊಂದರೆ ಅಥವಾ ಲಕ್ಷಣವೆಂದರೆ ನವೆ ಅಥವಾ ತುರಿಕೆ.ನಾವು ಕೆರೆದುಕೊಳ್ಳುವಂತೆ ಪ್ರೇರೇಪಿಸುವ ಸಂವೇದನೆಯೇ ತುರಿಕೆ.ಈ ತುರಿಕೆ ಒಂದು ಸರಳವಾದ ಸಮಸ್ಯೆಯೆನಿಸಿದರೂ ಇದರ ದುಷ್ಪರಿಣಾಮಗಳು ಬಹಳ.ಸಾಮಾಜಿಕವಾಗಿ ಎಲ್ಲರೊಂದಿಗೆ ಬೆರೆಯುವುದಕ್ಕೆ ಕಷ್ಟವಾಗುವುದು, ನಿದ್ರೆಗೆ ತೊಂದರೆಯಾಗುವುದು, ಏಕಾಗ್ರತೆಗೆ ಭಂಗವಾಗುವುದು, ಕೆರೆಯುವುದರಿಂದ ಗಾಯಗಳಾಗಿ ಸೋಂಕು,ವ್ರಣಗಳಾಗುವುದು, ಕೊನೆಗೆ ದೀರ್ಘಾವಧಿ ತುರಿಕೆಯಾದರೆ ದು:ಖ, ಖಿನ್ನತೆಗಳೂ ಆಗಬಹುದು.ಹಾಗಾಗಿ ಈ ತುರಿಕೆಯನ್ನು ಬೇಗನೆ ಪರಿಹರಿಸಿಕೊಳ್ಳುವುದು ಅತ್ಯಗತ್ಯ.ಈಗ ಚರ್ಮದ ತುರಿಕೆಗೆ ಸಾಮಾನ್ಯ ಕಾರಣಗಳು ಮತ್ತು ಪರಿಹಾರಗಳನ್ನು ನೋಡೋಣ.

ಕೀಟಗಳ ಕಚ್ಚುವಿಕೆ: ತುರಿಕೆಗೆ ಬಹಳ ಸಾಮಾನ್ಯವಾದ ಕಾರಣ ಸೊಳ್ಳೆ ಮೊದಲಾದ ಕೀಟಗಳ ಕಚ್ಚುವಿಕಯೇ ಎನ್ನಬಹುದು.ಆದರೆ ಎಷ್ಟೋ ಬಾರಿ ಜನರು ಇದನ್ನು ಸುಲಭವಾಗಿ ಒಪ್ಪುವುದಿಲ್ಲ.ಕೆರೆತ ಹಾಗೂ ಕೆರೆತದಿಂದಾಗಿರುವ ಗಾಯಗಳು ಅಥವಾ ಗುಳ್ಳೆಗಳು ಬಟ್ಟೆ ಮುಚ್ಚಿರದ ತೆರೆದ ಪ್ರದೇಶಗಳು, ಅಂದರೆ ಕೈಗಳು, ಮುಖ, ಕುತ್ತಿಗೆ,ಕಾಲುಗಳು, ಇಂಥ ಕಡೆಗಳಲ್ಲಾಗಿದ್ದರೆ ಹಾಗೂ ದೂರ ದೂರ ಆಗಿದ್ದರೆ ಅದು ಕೀಟಗಳ ಕಚ್ಚುವಿಕೆ ಎಂದು ದೃಢಪಡಿಸಬಹುದು.ಸಮಸ್ಯೆ ಆರಂಭವಾದ ಸ್ವಲ್ಪ ಪೂರ್ವದಲ್ಲಿ ಅವರು ಉದ್ಯಾನವನ, ಅರಣ್ಯ ಪ್ರದೇಶ, ಮೊದಲಾದ ಕೀಟಗಳು ಹೆಚ್ಚಾಗಿರುವ ಪ್ರದೇಶಗಳಿಗೆ ಭೇಟಿಯಿತ್ತಿದ್ದರೆ ಇದರ ಸಾಧ್ಯತೆ ಹೆಚ್ಚು.ಒಣ ಚರ್ಮ ಮತ್ತು ಸೂಕ್ಷ್ಮತೆಯಿರುವವರಿಗೆ ತುರಿಕೆ ಹೆಚ್ಚಾಗಿ ಹೆಚ್ಚು ದಿನಗಳೂ ಮುಂದುವರೆಯುತ್ತದೆ.ಒಂದು ಪ್ರದೇಶದಲ್ಲಿ ಸೊಳ್ಳೆಗಳ ಪ್ರಭೇದಗಳಿಗೆ ಒಗ್ಗಿರುವವರು ಬೇರೆ ಪ್ರದೇಶ ಅಥವಾ ಊರಿಗೆ ಹೋದರೆ ಅಲ್ಲಿನ ಸೊಳ್ಳೆಗಳ ಪ್ರಭೇದಗಳ ಕಚ್ಚುವಿಕೆಗೆ ತೀವ್ರವಾಗಿ ಪ್ರತಿಕ್ರಿಯಿಸುತ್ತಾರೆ ಆಗಲೂ ಈ ಸಮಸ್ಯೆಯಾಗುತ್ತದೆ.

ಕಜ್ಜಿ: ಕಜ್ಜಿ ಅಥವಾ ಸ್ಕೇಬೀಸ್ ಬಹಳ ಸಾಮಾನ್ಯವಾದ ಒಂದು ಚರ್ಮರೋಗ.ಹೆಚ್ಚಾಗಿ ಮಕ್ಕಳಲ್ಲಿ ಮತ್ತು ಅತಿ ಸನಿಹವಿರುವ ಗುಂಪುವಾಸ ಮಾಡುವವರಲ್ಲಿ ಕಂಡುಬರುವ, ಅಂಟುರೋಗವಾದ ಇದು ಸಾರ್ಕೋಪ್ಟೆಸ್ ಸ್ಕೇಬೀ ಎಂಬ ಪರಾವಲಂಬಿ ಕೀಟದಿಂದ ಬರುತ್ತದೆ.ಬೆರಳುಸಂದುಗಳು, ಮೊಣಕೈ, ಕಂಕುಳು, ಹೊಕ್ಕಳು, ತೊಡೆಗಳು, ಗುಪ್ತಾಂಗಗಳಲ್ಲಿ ಚಿಕ್ಕ ಚಿಕ್ಕ ಗುಳ್ಳೆಗಳಾಗಿ ವಿಪರೀತವಾಗಿ ಅದರಲ್ಲೂ ರಾತ್ರಿ ಹೆಚ್ಚು ತುರಿಸುತ್ತದೆ.

ಫಂಗಸ್ ರೋಗಗಳು: ಫಂಗಸ್ ರೋಗಗಳು ಅತ್ಯಂತ ಸಾಮಾನ್ಯವಾಗಿ ಉಂಟಾಗುವ, ಒಬ್ಬರಿಂದೊಬ್ಬರಿಗೆ ಹರಡುವ ರೋಗಗಳು.ಗಜಕರ್ಣ, ಹುಳುಕಡ್ಡಿ ಎಂದೆಲ್ಲಾ ಕರೆಯಲಾಗುವ ಇವನ್ನು ಆಂಗ್ಲಭಾಷೆಯಲ್ಲಿ ಟೀನಿಯಗಳೆಂದು ಕರೆಯುತ್ತಾರೆ.ತೊಡೆಸಂದಿಯಲ್ಲಾದರೆ ಟೀನಿಯ ಕ್ರೂರಿಸ್ ( Tinea cruris), ದೇಹದ ಮೇಲಾದರೆ ಟೀನಿಯ ಕಾರ್ಪೋರಿಸ್ ( Tinea corporis), ಹೀಗೆ ದೇಹದ ವಿವಿಧ ಭಾಗಗಳಿಗೆ ತಕ್ಕಂತೆ ಕರೆಯಲಾಗುತ್ತದೆ.ಫಂಗಸ್ ಅಥವಾ ಶಿಲೀಂಧ್ರಗಳೆಂಬ ಸೂಕ್ಷ್ಮ ಜೀವಿಗಳಿಂದ ಉಂಟಾಗುವ ಇವುಗಳಲ್ಲಿ ಕೆಂಪಾದ, ಅಂಚಿನಲ್ಲಿ ಪದರಗಳಿರುವ ಮಚ್ಚೆಗಳಾಗಿ ಬಹಳ ತುರಿಸುತ್ತವೆ.ಒದ್ದೆ ವಾತಾವರಣ, ಅಶುಚಿತ್ವ ಇವು ಆಗಲು ಪ್ರೋತ್ಸಾಹಿಸುತ್ತವೆ.ನಮ್ಮ ದೇಹದಲ್ಲೇ ಇರುವ ಕ್ಯಾಂಡಿಡಾ ಎಂಬ ಫಂಗಸ್ ನಿಂದ ಗುಪ್ತಾಂಗಗಳಲ್ಲಿ ಕೆಂಪು ಮಚ್ಚೆಗಳು ಮತ್ತು ತುರಿಕೆಗಳಾಗುವ ಕ್ಯಾಂಡಿಡಿಯಾಸಿಸ್ ರೋಗವಾಗಬಹುದು.ಅಶುಚಿತ್ವ ಮತ್ತು ಒದ್ದೆ ವಾತಾವರಣಗಳಿಂದ ಈ ಫಂಗಸ್ ಹೆಚ್ಚಿ ಹೀಗಾಗುತ್ತದೆ.

ಅರ್ಟಿಕೇರಿಯ: ತುರಿಸುವ, ಅಲ್ಪ ಕಾಲಾವಧಿಯವರೆಗೂ ಇದ್ದು ಮತ್ತೆ ಮತ್ತೆ ಬರುವ ಕೆಂಪು ಗಂಧೆಗಳಿಗೆ ಅರ್ಟಿಕೇರಿಯ ಎನ್ನುತ್ತಾರೆ. ಇದು ಅಲರ್ಜಿ ಅಥವಾ ಒಗ್ಗದಿರುವಿಕೆಯಿಂದ ಆಗುತ್ತದೆ.ಅಂದರೆ, ಕೆಲವು ಪದಾರ್ಥಗಳಿಗೆ ದೇಹವು ಒಗ್ಗದೇ, IgE ಎಂಬ ಆಂಟಿಬಾಡಿಗಳು ಉತ್ಪತ್ತಿಯಾಗಿ ಅವುಗಳ ಪ್ರಚೋದನೆಯಿಂದ ಮಾಸ್ಟ್ ಸೆಲ್ ಮತ್ತು ಬೇಸೋಫಿಲ್ ಗಳೆಂಬ ಕೋಶಗಳಿಂದ ಹಿಸ್ಟಮಿನ್ ಎಂಬ ರಾಸಾಯನಿಕ ಬಿಡುಗಡೆಯಾಗಿ ರಕ್ತಸಂಚಾರ ಹೆಚ್ಚುವುದು ಹಾಗೂ ನರಗಳ ಪ್ರಚೋದನೆಯಾಗಿ ಕೆಂಪು ಗಂಧೆಗಳು ಮತ್ತು ತುರಿಕೆಯಾಗುತ್ತದೆ.ಆಹಾರ ಪದಾರ್ಥಗಳು, ಔಷಧಿಗಳು, ಹೂವುಗಳ ಪರಾಗ, ಕರುಳಿನಲ್ಲಿರುವ ಜಂತುಹುಳುಗಳು, ದೈಹಿಕ ಸೋಂಕುಗಳಿಗೆ ಕಾರಣವಾಗುವ ರೋಗಾಣುಗಳು, ಕೀಟಗಳ ಕಚ್ಚುವಿಕೆ, ಕೂದಲಿಗೆ ಬಳಸುವ ಹೇರ್ ಡೈ ಮೊದಲಾದ ಸ್ಪರ್ಶದ ವಸ್ತುಗಳು, ಮುಂತಾದವುಗಳಿಗೆ ಅಲರ್ಜಿಯಾಗಬಹುದು.ಅಂತೆಯೇ ಬಿಸಿಲು, ಚಳಿಯಂಥ ಭೌತಿಕ ಅಂಶಗಳಿಂದಲೂ ಅರ್ಟಿಕೇರಿಯ ಆಗಬಹುದು.

ಔಷಧಿಗಳ ಅಲರ್ಜಿ: ಕೆಲವು ಔಷಧಿಗಳ ಸೇವನೆಯಿಂದ ಕೆಲವರಿಗೆ ಅಲರ್ಜಿಯಾಗಿ ಕೆಂಪಾದ ಸಣ್ಣ ಗುಳ್ಳೆಗಳು ಮತ್ತು ನವೆಯುಂಟಾಗುತ್ತವೆ.ಇದು ಅರ್ಟಿಕೇರಿಯ ಅಲ್ಲದೇ ಬೇರೆ ರೀತಿ ಕಾಣಿಸಿಕೊಳ್ಳುವ ಔಷಧ ಅಲರ್ಜಿ.

ಇಸುಬು: ಇಸುಬು ಅಥವಾ ಎಗ್ಸೆಮ ತುರಿಕೆಯ ಒಂದು ಸಾಮಾನ್ಯ ಸಮಸ್ಯೆ.ಚರ್ಮದುರಿತವಾಗುವುದರಿಂದ ಈಗ ಇದನ್ನು ಡರ್ಮಟೈಟಿಸ್ ಎನ್ನುತ್ತಾರೆ.ಇದರಲ್ಲಿ ಹೊರಜನಿತ ಮತ್ತು ಒಳಜನಿತ ಎಂಬ ಎರಡು ವಿಧಗಳಿವೆ.ಹೊರಜನಿತ ಬಗೆ, ಕೆಲವು ವಸ್ತುಗಳ ಸ್ಪರ್ಶದಿಂದ ಆಗುವ ಅಲರ್ಜಿಯಿಂದ ಆಗುತ್ತದೆ.ಉದಾಹರಣೆಗೆ ಕುಂಕುಮದ ಅಲರ್ಜಿ, ಸರ,ಬಳೆ ಇತ್ಯಾದಿ ಆಭರಣಗಳ ಅಲರ್ಜಿ, ಬಟ್ಟೆ ಒಗೆಯುವ ಸಾಬೂನಿನ ಹಾಗೂ ಪಾತ್ರೆ ತೊಳೆಯುವ ಪುಡಿಯ ಅಲರ್ಜಿ ಮೊದಲಾದವು. ಇದನ್ನು ಸ್ಪರ್ಶದ ಅಲರ್ಜಿ ಅಥವಾ ಕಾಂಟ್ಯಾಕ್ಟ್ ಡರ್ಮಟೈಟಿಸ್ ಎನ್ನುತ್ತಾರೆ.ಬಿಸಿಲಿನ ಅಲರ್ಜಿಯೂ ಈ ಬಗೆಯದ್ದೇ ಆಗಿದೆ.ಬಿಸಿಲಿನಲ್ಲಿರುವ ಅತಿನೇರಳೆ ಕಿರಣಗಳಿಂದ ಈ ಅಲರ್ಜಿ ಆಗುತ್ತದೆ.ಇದನ್ನು ಫೋಟೋಡರ್ಮಟೈಟಿಸ್ ಎನ್ನುತ್ತಾರೆ. ಅಂತೆಯೇ ಬ್ಯಾಕ್ಟೀರಿಯಾ ಮುಂತಾದ ರೋಗಾಣುಗಳಿಂದ ಸೋಂಕಾಗಿ ಇಸುಬಾಗಬಹುದು. ಒಳಜನಿತ ಬಗೆಯಲ್ಲಿ ಇಸುಬಿಗೆ ಕಾರಣವಾಗುವ ದೋಷಗಳು ವ್ಯಕ್ತಿಯಲ್ಲೇ ಇರುತ್ತವೆ.ಒಣಚರ್ಮ ಅಂಥ ಒಂದು ದೋಷ.ಒಣಚರ್ಮದಿಂದ ನವೆಯಾಗಿ ಕೆರೆದು ಇಸುಬಾಗಬಹುದು.ವೇರಿಕೋಸ್ ವೇಯ್ನ್ಸ್ ಸಮಸ್ಯೆಯಲ್ಲಿ ಕಾಲಿನ ಅಪಧಮನಿಗಳು ಉಬ್ಬಿ ರಕ್ತ ಸಂಚಾರ ನಿಧಾನವಾಗಿ ಚರ್ಮಕ್ಕೆ ಪೋಷಣೆ ಸಿಗದೇ ಇಸುಬಾಗಬಹುದು.ಬಹಳ ಹೊತ್ತು ನಿಂತು ಕೆಲಸ ಮಾಡುವುದರಿಂದ ಈ ಸಮಸ್ಯೆಯಾಗುತ್ತದೆ. ಕೆಲವೊಮ್ಮೆ ಸಣ್ಣ ಕಾರಣಗಳಿಂದ ನವೆಯು ಆರಂಭವಾಗಿ ಮಾನಸಿಕ ಒತ್ತಡದಿಂದ ಹೆಚ್ಚು ಕೆರೆಯುತ್ತಾ ಗಟ್ಟಿಯಾದ ಗುಳ್ಳೆಗಳು ಇಲ್ಲವೇ ಮಚ್ಚೆಗಳಾಗಿ ಇನ್ನಷ್ಟು ನವೆಯಾಗುತ್ತದೆ.ನವೆ- ಕೆರೆತ-ನವೆ, ಹೀಗೊಂದು ವಿಷವರ್ತುಲದಂತಾಗುತ್ತದೆ.

ಎಟೋಪಿಕ್ ಡರ್ಮಟೈಟಿಸ್: ಇದೊಂದು ಸಾಮಾನ್ಯ ತೊಂದರೆ.ಚರ್ಮದ ಸೂಕ್ಷ್ಮತೆಯಿಂದ ಇದು ಉಂಟಾಗುತ್ತದೆ.ಎರಡು ವರ್ಷದೊಳಗಿನ ಮಕ್ಕಳಲ್ಲಿ ಮುಖ ಮತ್ತು ಕೈಕಾಲುಗಳಲ್ಲಿ ಕೆಂಪು ಮಚ್ಚೆಗಳಾದರೆ ಅನಂತರದ ವಯೋಮಾನದ ಮಕ್ಕಳಿಗೆ ಹಾಗೂ ಯುವಕರಲ್ಲಿ ತೋಳಿನ ಮತ್ತು ಕಾಲಿನ ಹಳ್ಳಗಳಲ್ಲಿ ಗಟ್ಟಿಯಾದ ತುರಿಸುವ ಮಚ್ಚೆಗಳಾಗುತ್ತವೆ.ವಯಸ್ಕರಾದಂತೆ ಇದು ನಿಧಾನವಾಗಿ ಕಡಿಮೆಯಾಗುತ್ತದೆ.ಕೆಲವೊಮ್ಮೆ ಯಾವುದೇ ಮಚ್ಚೆಗಳಿರದೇ ಬರಿದೇ ತುರಿಕೆಯಾಗುತ್ತದೆ. ಚಳಿ, ಧೂಳು,ಒಣಚರ್ಮ,ಪುಷ್ಪಗಳ ಪರಾಗ, ಮತ್ತು ಕೆಲವು ಆಹಾರ ಪದಾರ್ಥಗಳು, ಇದನ್ನು ಉದ್ರೇಕಿಸುತ್ತದೆ. 

ಸೋರಿಯಾಸಿಸ್: ರೋಗನಿರೋಧಕ ಶಕ್ತಿ ಚರ್ಮವನ್ನು ಉದ್ರೇಕಿಸಿ ಅದು ಉರಿತಕ್ಕೊಳಗಾಗುವ ಹಾಗೂ ಹೆಚ್ಚಾಗಿ ಬೆಳೆಯುವ ಒಂದು ಚರ್ಮರೋಗ ಸೋರಿಯಾಸಿಸ್.ಇದರಲ್ಲಿ ಬಿಳಿಯ ಪದರಗಳಿರುವ ಕೆಂಪಾದ ಮಚ್ಚೆಗಳು ಆಗುತ್ತವೆ.ಇವು ಸಾಮಾನ್ಯವಾಗಿ ತುರಿಸದಿದ್ದರೂ ಮಚ್ಚೆಗಳನ್ನು ಕಿತ್ತುವುದು, ಒಣಚರ್ಮ, ಕೆಲವರಲ್ಲಿ ತುರಿಕೆಯುಂಟುಮಾಡುತ್ತವೆ.ಚಳಿ, ಒಣಚರ್ಮ, ದೈಹಿಕ ಹಾಗೂ ಮಾನಸಿಕ ಒತ್ತಡಗಳು,ಧೂಮಪಾನ ಮತ್ತು ಮದ್ಯಪಾನಗಳು ಈ ರೋಗವನ್ನು ಹೆಚ್ಚಿಸುತ್ತವೆ.ಇದನ್ನು ಸಂಪೂರ್ಣ ಗುಣಪಡಿಸಲಾಗದಿದ್ದರೂ ನಿಯಂತ್ರಿಸಬಹುದು.

ಒಣಚರ್ಮ: ಕೆಲವೊಮ್ಮೆ ಯಾವುದೇ ಚರ್ಮರೋಗವಿರದಿದ್ದರೂ ಕೇವಲ ಒಣಚರ್ಮದಿಂದಲೇ ತುರಿಕೆಯಾಗುತ್ತದೆ.ಒಣಚರ್ಮದಿಂದ ಚರ್ಮದ ಸಮಗ್ರತೆಗೆ ತೊಂದರೆಯಾಗಿ ಕಿರಿಕಿರಿಯಾಗುತ್ತಾ ನವೆಯಾಗುತ್ತದೆ.ವಯಸ್ಸು ಹೆಚ್ಚಾದಂತೆ ಚರ್ಮದಲ್ಲಿ ಕೊಲ್ಯಾಜೆನ್ ಅಂಶ ಕಡಿಮೆಯಾಗಿ ಒಣಗುತ್ತಾ ತುರಿಕೆಯಾಗುತ್ತದೆ.ಕೆಲವರಿಗೆ ಚಿಕ್ಕ ವಯಸ್ಸಿನಲ್ಲೇ ಇಕ್ಥಿಯೋಸಿಸ್ ಎಂಬ ಕಾಯಿಲೆಯಿದ್ದು ಇದರಲ್ಲಿ ಸತ್ತ ಚರ್ಮ ಹೋಗದೇ ಗಟ್ಟಿಯಾಗಿ ಮೀನಿನ ಚರ್ಮದಂತೆ ಕಾಣುತ್ತದೆ.ಇದೂ ತುರಿಸುತ್ತದೆ.ವಯಸ್ಕರಾದಂತೆ ಇದು ಕಡಿಮೆಯಾಗುತ್ತದೆ.ಕೆಲವರಿಗೆ ಇದು ವೃದ್ಧಾಪ್ಯದಲ್ಲಿ ಬರುತ್ತದೆ ಹಾಗೂ ಕೆಲವು ಔಷಧಿಗಳ ಸೇವನೆಯಿಂದ ದುಷ್ಪರಿಣಾಮವಾಗಿ ಆಗುತ್ತದೆ.ಚಳಿ ಹಾಗೂ ಗಾಳಿ ಒಣಚರ್ಮವನ್ನು ಹೆಚ್ಚಿಸಿ ತುರಿಕೆಯನ್ನು ಹೆಚ್ಚಿಸುತ್ತದೆ.ಜೀವಸತ್ವ 'ಎ' ಕಡಿಮೆಯಾದರೂ ಒಣಚರ್ಮ ಉಂಟಾಗಿ ತುರಿಸುತ್ತದೆ.

ಗರ್ಭಿಣಿಯರಲ್ಲಿ ತುರಿಕೆ: ಗರ್ಭಿಣಿಯರಲ್ಲಿ ಪಿತ್ತದ ಅಂಶ ಹೆಚ್ಚಾಗಿ ಕಾಮಾಲೆ ಹಾಗೂ ನವೆ ಉಂಟಾಗಬಹುದು.ಹಾರ್ಮೋನ್ ಗಳ ವ್ಯತ್ಯಾಸದಿಂದಲೂ ತುರಿಕೆಯಾಗಬಹುದು.ಕೆಲವರಿಗೆ ಗರ್ಭಧಾರಣೆಯ ಕೊನೆಯ ಮೂರು ತಿಂಗಳುಗಳಲ್ಲಿ ಹೊಟ್ಟೆಯಲ್ಲಿ ಗಂಧೆಗಳಂಥ ಕೆಂಪು ತುರಿಸುವ ಗುಳ್ಳೆಗಳಾಗಿ ಇತರ ಭಾಗಗಳಿಗೆ ಹರಡುತ್ತವೆ.ಕಾರಣ ಸ್ಪಷ್ಟವಿಲ್ಲದ ಇದನ್ನು pruritic urticarial papules and plaques of pregnancy ( Puppp) ಎಂದು ಕರೆಯುತ್ತಾರೆ.ಇದು ಪ್ರಸವದ ನಂತರ ನಿಧಾನವಾಗಿ ಕಡಿಮೆಯಾಗುತ್ತದೆ.ಅಪರೂಪವಾಗಿ ಪೆಂಫಿಗಾಯ್ಡ್ ಗೆಸ್ಟೇಷನಿಸ್ ಎಂಬ ರೋಗನಿರೋಧಕ ಶಕ್ತಿ ತಿರುಗಿ ಬೀಳುವ ಕಾಯಿಲೆಯಾಗಿ ತುರಿಸುವ ನೀರ್ಗುಳ್ಳೆಗಳಾಗುತ್ತವೆ.

ಆಂತರಿಕ ಕಾರಣಗಳು: ಪಿತ್ತಜನಕಾಂಗದ ಕಾಯಿಲೆ, ಮೂತ್ರಪಿಂಡಗಳ ಕಾಯಿಲೆ, ಮಧುಮೇಹ, ರಕ್ತಹೀನತೆ, ಥೈರಾಯ್ಡ್ ಗ್ರಂಥಿಯ ಸಮಸ್ಯೆಗಳು, ಮೊದಲಾದ ಆಂತರಿಕ ಕಾಯಿಲೆಗಳಿಂದಲೂ ತುರಿಕೆಯಾಗುತ್ತದೆ.

ಪರಿಹಾರ ಮತ್ತು ನಿವಾರಣೋಪಾಯಗಳು: ತುರಿಕೆಯಿರುವವರು ಬೇಗನೆ ಚರ್ಮರೋಗ ತಜ್ಞರನ್ನು ಭೇಟಿಯಾಗಬೇಕು.ತುರಿಕೆಗೆ ಮೂಲ ಕಾರಣ ಏನೆಂಬುದನ್ನು ಪರಿಶೀಲಿಸಿ ಅದಕ್ಕೆ ಚಿಕಿತ್ಸೆ ಮಾಡಿದರೆ ತುರಿಕೆ ಕಡಿಮೆಯಾಗುತ್ತದೆ.ಕೆಲವೊಮ್ಮೆ ಇದನ್ನು ತಿಳಿಯಲು ರಕ್ತ ಪರೀಕ್ಷೆ ಬೇಕಾಗಬಹುದು. ಕಜ್ಜಿ ಮತ್ತು ಫಂಗಸ್ ಕಾಯಿಲೆಗಳಿಗೆ ಒಳ್ಳೆಯ ಚಿಕಿತ್ಸೆಗಳು ಲಭ್ಯವಿವೆ.ನಿತ್ಯ ಸ್ನಾನ, ಚೆನ್ನಾಗಿ ಒರೆಸಿಕೊಳ್ಳುವುದು, ನಿತ್ಯವೂ ಬೇರೆ ಬಟ್ಟೆಗಳನ್ನು ಧರಿಸುವುದು, ಬೆವರುವುದನ್ನು ಪ್ರೋತ್ಸಾಹಿಸುವ ಬಿಗಿ ಬಟ್ಟೆಗಳನ್ನು ಬೇಸಿಗೆಯಲ್ಲಿ ಧರಿಸದಿರುವುದು, ಮೊದಲಾದ ಕ್ರಿಯೆಗಳಿಂದ ಫಂಗಸ್ ರೋಗಗಳಾಗದಂತೆ ತಡೆಯಬಹುದು. ಕೀಟಗಳ ಕಚ್ಚುವಿಕೆಯನ್ನು ತಪ್ಪಿಸಲು ಸಂಜೆಯ ಬಳಿಕ ಕೈಕಾಲುಗಳನ್ನು ಪೂರ್ತಿ ಮುಚ್ಚುವ ಬಟ್ಟೆಗಳನ್ನು ಧರಿಸಬೇಕು.ಅರ್ಟಿಕೇರಿಯಗೆ ಕಾರಣವಾಗುವ ಅಲರ್ಜಿಯ ಅಂಶವನ್ನು ಗುರುತಿಸಿ ದೂರ ಮಾಡಿದರೆ ಅದು ಗುಣವಾಗುತ್ತದೆ.ದೀರ್ಘಾವಧಿಯ ಅರ್ಟಿಕೇರಿಯದಲ್ಲಿ ಕೆಲವೊಮ್ಮೆ ಅದು ತಿಳಿಯದಿದ್ದಾಗ ದೀರ್ಘಕಾಲ ಆಂಟಿಹಿಸ್ಟಮೀನ್ ಮಾತ್ರೆಗಳನ್ನು ವೈದ್ಯರ ನಿರ್ದೇಶನದಲ್ಲಿ ಸೇವಿಸಿದರೆ ಇದು ಗುಣವಾಗುತ್ತದೆ.ಔಷಧಿಗಳ ಅಲರ್ಜಿಯಿದ್ದಲ್ಲಿ ಆ ಔಷಧಿಗಳನ್ನು ನಿಲ್ಲಿಸಬೇಕು.ಇಸುಬಿಗೆ ಕಾರಣವಾಗುವ ವಸ್ತುಗಳನ್ನು ದೂರ ಮಾಡಬೇಕು.ಇವು ಬಟ್ಟೆ ಸಾಬೂನು ಮತ್ತು ಪಾತ್ರೆ ಪುಡಿಯಾಗಿದ್ದರೆ ಕೈಗವುಸು ಹಾಕಿಕೊಂಡು ಅವನ್ನು ಬಳಸಬೇಕು.ಎಟೋಪಿಕ್ ಡರ್ಮಟೈಟಿಸ್, ಸೋರಿಯಾಸಿಸ್,ಒಣ ಇಸುಬುಗಳಲ್ಲಿ ತೇವಾಂಶ ಹೆಚ್ಚಿಸುವ ದ್ರಾವಣಗಳನ್ನು ಔಷಧಿಯ ಲೇಪನಗಳೊಂದಿಗೆ ಬಳಸಬೇಕು. ಒಣಚರ್ಮಕ್ಕೂ ತೇವಾಂಶ ಹೆಚ್ಚಿಸುವ ದ್ರಾವಣಗಳನ್ನು ಸವರುತ್ತಿರಬೇಕು.ಪೇಟೆಯಲ್ಲಿ ಸಿಗುವ ದ್ರಾವಣಗಳಲ್ಲದೇ ಸುಲಭವಾಗಿ ದೊರೆಯುವ ಕೊಬ್ಬರಿ ಎಣ್ಣೆಯಂಥ ದ್ರಾವಣಗಳನ್ನೂ ಬಳಸಬಹುದು.ನಿತ್ಯ ಸ್ನಾನ ಹಾಗೂ ಸ್ನಾನಕ್ಕೂ ತೇವಾಂಶ ಹೆಚ್ಚಿಸುವ ಸಾಬೂನನ್ನು ಬಳಸುವುದು ಒಣಚರ್ಮವನ್ನು ನಿವಾರಿಸುತ್ತದೆ. ಬಿಸಿಲಿನ ಅಲರ್ಜಿಯನ್ನು ತಪ್ಪಿಸಲು ಒಳ್ಳೆಯ ಸನ್ ಸ್ಕ್ರೀನ್ ಅಥವಾ ಬಿಸಿಲುನಿವಾರಕಗಳನ್ನು ಬಳಸಬೇಕು. ಸಾಮಾನ್ಯವಾಗಿ ಯಾವುದೇ ಕಾರಣದ ತುರಿಕೆಗೆ ಆಂಟಿ ಹಿಸ್ಟಮಿನ್ ಮಾತ್ರೆಗಳನ್ನು ನೀಡಲಾಗುತ್ತದೆ.ಆದರೆ ಇಷ್ಟು ಸಾಲದೇ ಮೂಲ ಕಾರಣವನ್ನು ನಿವಾರಿಸಬೇಕು.ಜೊತೆಗೆ ಕೆರೆದಷ್ಟೂ ನವೆ ಹೆಚ್ಚುವುದರಿಂದ ಕೆರೆಯುವುದನ್ನು ತಪ್ಪಿಸಿ ಮನಸ್ಸನ್ನು ಬೇರೆ ಕಡೆ ಹರಿಸಿ ತುರಿಕೆ ಮರೆಯುವಂತೆ ಮಾಡಬೇಕು.

                           ಡಾ.ಬಿ.ಆರ್.ಸುಹಾಸ್