ಈ ಚಿತ್ರದಲ್ಲಿ ಕಾಣುತ್ತಿರುವ ದೊಡ್ಡ ದುಂಬಿ ಬಡಗಿ ದುಂಬಿ, ಅಥವಾ ಕಾರ್ಪೆಂಟರ್ ಬೀ. ಈ ಬಡಗಿ ದುಂಬಿಗಳು ದೊಡ್ಡ ದೇಹವನ್ನು ಹೊಂದಿದ್ದು ಕಪ್ಪಾಗಿರುತ್ತವೆ ಅಥವಾ ಬಹುತೇಕ ಕಪ್ಪಾಗಿರುತ್ತವೆ. ಇವು ಬಂಬಲ್ ಬೀ ಎಂಬ ಸಾಮಾನ್ಯ ದುಂಬಿಯನ್ನೇ ಹೋಲುತ್ತವೆಯಾದರೂ ಇವುಗಳ ಹೊಟ್ಟೆ ಬಹಳ ಮೃದುವಾಗಿ ರೋಮರಹಿತವಾಗಿರುತ್ತವೆ. ಕೆಲವು ಪ್ರಭೇದಗಳು ಎದೆಯ ಭಾಗದಲ್ಲಿ ಬಿಳಿ ಅಥವಾ ಹಳದಿ ರೋಮಗಳುಳ್ಳ ಮಚ್ಚೆಗಳನ್ನು ಹೊಂದಿರುತ್ತವೆ. ಕೆಲವು ಪ್ರಭೇದಗಳಲ್ಲಿ ಗಂಡುಗಳು ಬಿಳಿ ಅಥವಾ ಹಳದಿ ಮುಖ ಹಾಗೂ ದೊಡ್ಡ ಸಂಯುಕ್ತ ಕಣ್ಣುಗಳನ್ನು ಹೊಂದಿರುತ್ತವೆ.ಇವುಗಳ ರೆಕ್ಕೆಗಳು ಹೊಳೆಯುತ್ತಿರುತ್ತವೆ. ಇವುಗಳಿಗೆ ಬಡಗಿ ದುಂಬಿಗಳೆಂದು ಹೆಸರು ಬರಲು ಕಾರಣವೇನೆಂದರೆ ಇವು ಗಟ್ಟಿಯಾದ, ಸತ್ತ ಅಥವಾ ಹಳೆಯ ಮರ ಇಲ್ಲವೇ ಬಿದಿರಿನಲ್ಲಿ ಬಿಲ ಕೊರೆದು ಗೂಡು ಮಾಡುತ್ತವೆ. ಈ ಗೂಡುಗಳಲ್ಲಿ ಉದ್ದವಾದ ಸುರಂಗಗಳಿರುತ್ತವೆ. ಹೆಣ್ಣು ದುಂಬಿ ಈ ಸುರಂಗಗಳ ಪ್ರತ್ಯೇಕ ಘಟಕಗಳಲ್ಲಿ ಮೊಟ್ಟೆಗಳನ್ನಿಟ್ಟು ಸ್ವಲ್ಪ ಆಹಾರ ದಾಸ್ತಾನನ್ನೂ ಇರಿಸಿ, ಗೂಡನ್ನು ತನ್ನ ಎಂಜಲು ಹಾಗೂ ಸಸ್ಯಾಂಶದಿಂದ ಮುಚ್ಚುತ್ತದೆ. ಮರಿಗಳು ಮೊಟ್ಟೆಯೊಡೆದು ಹೊರಬಂದ ಬಳಿಕ, ಆಹಾರ ಸೇವಿಸಿ ಬೆಳೆದು, ಪ್ಯೂಪಾ ಅಥವಾ ಗೂಡು ಕಟ್ಟಿಕೊಂಡು, ವಯಸ್ಕರಾದ ಬಳಿಕ ಹೊರಬರುತ್ತವೆ. ಈ ಬಡಗಿ ದುಂಬಿಗಳು, ಕಾಡುಗಳು, ಹುಲ್ಲುಗಾವಲುಗಳು, ನಗರ ಪ್ರದೇಶಗಳು, ಮೊದಲಾಗಿ ವಿವಿಧ ಕಡೆಗಳಲ್ಲಿ , ಮುಖ್ಯವಾಗಿ ಪರಾಗ ಮತ್ತು ರಸವುಳ್ಳ ಹೂವುಗಳು ಹೆಚ್ಚಾಗಿರುವಲ್ಲಿ ಕಂಡುಬರುತ್ತವೆ. ಹೆಣ್ಣು ದುಂಬಿಯು ಮಾತ್ರ ಸ್ಟಿಂಗರ್ ಅಥವಾ ಕುಟುಕುವ ಅಂಗವನ್ನು ಹೊಂದಿರುತ್ತದೆ. ಅದು ಮೊಟ್ಟೆಗಳನ್ನಿಡುವ ಓವಿಪಾಸಿಟರ್ ಅಂಗದ ಮಾರ್ಪಾಟಾಗಿದೆ. ಬಡಗಿ ದುಂಬಿಗಳು ಜೇನನ್ನು ಉತ್ಪತ್ತಿ ಮಾಡುವುದಿಲ್ಲ. ಇವು ಕೆಣಕದೇ ಕುಟುಕುವುದಿಲ್ಲ. ಈ ಬಡಗಿ ದುಂಬಿಗಳಲ್ಲಿ , ವೈಯೊಲೆಟ್ ಕಾರ್ಪೆಂಟರ್ ಬೀ, ಬ್ರಾಡ್ ಹ್ಯಾಂಡೆಡ್ ಕಾರ್ಪೆಂಟರ್ ಬೀ ಮೊದಲಾದ ಹಲವಾರು ಪ್ರಭೇದಗಳಿವೆ.
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ